“O Porquiño polo que vale” (La Región TV e Televisión de Galicia) é o primeiro formato presentado por Duarte Galbán xunto á compañeira Tamara Pérez.

Hai proxectos que marcan un antes e un despois na vida das persoas que o levan a cabo. Este sen lugar a dúbidas, é un deles. A primeira oportunidade. A miña primeira vez… Xa sabedes o que din, que nunca se esquecen… Eu garantízovos que non o farei.

Rodeado dun equipo inmellorable, comezamos a xirar por todo o país coma se dun circo se tratase, coa finalidade de facer comedia para televisión e ao mesmo tempo arrancar un sorriso alí por onde pasabamos. Prométovos que é incrible chegar a calquera vila e ver como a xente está disposta ao que faga falla con tal de sorrir. É impagable. É necesario.

Un concurso de humor no que os nosos concursantes participan en distinto tipo de probas pola rúa a cambio do mellor xamón de Galicia. Probas moi gamberras e atrevidas que non estamos tan acostumados a ver en televisión. Un formato fresco, canalla e de moitas, moitas risas que ocupa as tardes da Televisión de Galicia na franxa previa ao Telexornal.